旅遊攻略—金澤 (近江町市場) Part 2
上回就講到近江町市場入面，係間最大嘅雜貨鋪對面有一間食海鮮丼好新鮮好厚切嘅！會咁岩上到黎我哋呢個fan page睇我哋呢篇文嘅你，一睇都知道唔係一個甘於平凡嘅人啦！所以呢，我哋梗係要介紹返一間比較特別嘅餐廳比你得啦！
嗱我哋今次介紹嘅呢一間餐廳係一間非常之地道嘅餐廳！呢一間其實主要係一間賣海鮮嘅鋪頭，但係奇奇怪怪咁樣擺左兩三張枱喺度俾你叫嘢食！我見呢一間餐廳又唔使排隊，但係其他餐廳就排到痴咗線咁，咪膽粗粗試吓呢一間囉！老老實實，佢可以比客人揀嘅款式真係少之又少！但係竟然比我搵到一樣最特別嘅嘢，係咩？就係吞拿魚嘅面頰啦！吞拿魚面頰，真係諗都無諗過會咁樣當刺身咁食！話晒一條魚都係得兩邊面頰你話攞嚟做魚生飯，要有幾多個魚頭先做到呢！咁罕有，我哋梗係要去試吓啦咁難得！
一咬落去，嘩！估唔到咁鬼彈牙，講種彈牙嘅程度你完全唔會覺得自己係食緊魚生！最多都以為自己去咗長洲食魚蛋！ （我知呢個比喻好差，但係咁先形容到嗰種彈牙嘅程度！ ）咁同埋除咗吞拿魚面頰之外，個海鮮丼入面都有其他海鮮嘅，包括吞拿魚劍魚等等！
講到呢度，你實會問，間鋪頭叫咩名先？講真，我都唔知間鋪頭叫咩名！但係呢，如果你由正門出發向前行係第一個路口轉右行到尾轉左，你就會見到一間買完海鮮嘅鋪頭，有兩張枱擺喺度，就係果一間啦！佢隔離鋪，即係轉角位嗰間，係賣生果架！其實我行咗一個圈，都只係得呢一間有兩張枱擺係度，所以好易認架！下次你去近江町市場，唔想跟住本旅遊書咁hea食，就不妨試吓呢一間平民嘅小舖啦！
Search